४० लाख उपत्यकाबासी खुसी हुने गरी विद्यासुन्दर शाक्यले गरे यस्तो निर्णय

सुरुवाती अवस्थामा निकै विवादीत बनेको भए पनि पछिल्ला समय काठमाडौँ महानगरपालिकामा विकासको कामले गति लिएको छ ।

स्थानिय तहको निर्वाचन जनप्रतिनिधि आएपछिको मुख्य प्राथमिकतामा परेको ‘क्लिन द सिटी’ (सफा शहर) अभियान अहिले तीव्ररुपमा अघि बढेको छ भने अन्य विकास निर्माणको काम पनि भइरहेको छ ।

करिब एक हप्तादेखि बिहानको समयमा ब्रुमर (धुलो सोस्ने) को माध्यमबाट सडकको थुलो उठाएको कामपाले बेलुकीको समयमा भने जेट मेसिनबाट सडक पानीले पखालेर शहर सफा राख्ने कामलाई निरन्तर अघि बढाएको छ ।

स्थानीय सरकारले यसरी काम गरिरहँदा केन्द्र सरकारले सहयोग नगरेको आरोप पनि स्थानीय सरकारले केन्द्र सरकारलाई लगाएको छ । स्थानीय सरकारले हरेक विकास निर्माणको काम गर्दा स्थानीय सरकारलाई पूर्व जानकारी र सम्पन्न गर्ने कार्ययोजनासहित दिनुपर्ने करिब एक महिना अघि प्रमुख विद्यासुन्दर शाक्यको अध्यक्षतामा बसेको बैठकले निर्णय गरिसकेको छ ।

नेपाल सरकारका विभिन्न निकायहरुले महानगरसँग समन्वय नै नगरी आफुखुशी सडक तथा फुटपाथ भत्काउने र लामो समयसम्म मर्मत नगर्ने प्रवृति रहेको भन्दै कामपाले गत १४ गते विज्ञप्ति जारी गरी आगामी दिनमा कामपासँग समन्वय गरेर मात्र काम गर्न पनि विज्ञप्तिमार्फत अनुरोध गरेको छ ।

केही समय अघिमात्र कामपाले निर्माण गरेको भोटाहीटीदेखि जमलसम्मको फुटपाथ निर्माण गरिसकेको भएपनि नेपाल खानेपानी विकास समितिले मेलम्ची खानेपानी ल्याउने नाममा भत्काएको बताउँदै कामपाका प्रमुख विद्यासुन्दर शाक्यले भने , “यसरी भत्काएको सडक सम्बन्धित निकायले नै निर्माण गर्नुपर्छ ।”

शाक्यका अनुसार अहिले मात्र कामपाले रु डेढ अर्बको सडक निर्माण कार्य गरिरहेको छ । सडक निर्माणअन्तर्गत अहिले ३२ वटै वडामा काम भइरहेको छ ।

नियमानुसार ८ मिटर सम्मको सडक निर्माण गर्ने जिम्मा मात्र कामपाको हुन्छ भने आठ मिटरभन्दा माथिको सडक निर्माणको काम केन्द्र सरकारले गर्नुपर्ने रहेको छ । निर्वाचनका समयमा जनताका सामु गरेका प्रतिबद्धता क्रमिक रुपमा पूरा गरिने उनले जाकारी दिएका छन् ।

कामपाका क्षेत्रमा भएको जस्तोसुकै राम्रा नराम्रा कामको जनतालाई जवफदेहिता कामपाले दिनुपर्ने तर निर्माणको काममा केन्द्र सरकारसँग समन्वय नहुँदा समस्या भोग्नु परेको सहप्रवक्ता नवराज ढकालको गुनासो छ ।

पछिल्लो समय मेलम्ची खानेपानीको कारण धुलैधुलो भएको सडक सफा गर्नको लागि एकहप्ता अघिदेखि कामपाले सडकको धुलो ब्रुमरको माध्यमबाट उठाउने काम गरिरहेको छ । टुँडीखेल, रत्नपार्क र जमल क्षेत्रमा धुलो उठाउने काम सकिइसकेको छ भने पुतलीसडक क्षेत्रको काम आज भइरहेको छ । सफा गर्ने क्रममा कामपाले धुलो मात्रै दैनिक पाँच टन सङ्कलन गर्ने गरेको छ ।

त्यसैगरी, शहरलाई हरियाली बनाउने काम पनि कामपाले गरिरहेको छ । जमल, रत्नपार्क, न्युरोड, सुनधारालगायत स्थानमा वोटविरुवा रोपीसकेको छ भने अन्य केही स्थानमा निर्वाचन पछि रोपिने प्रवक्ता ढकालको भनाई छ ।

केन्द्र सरकारले शुरु गरेका कलङ्की–त्रिपुरेश्वर र चावहील–बौद्ध सडक विस्तारको काम अत्यन्तै सुस्त गतिमा भएपनि कामपाका ३२ वटै वडामा कामपाको क्षेत्राधिकारभित्र पर्ने खाल्डाखुल्डी पुर्ने काम पनि गरिरहेको छ ।